தை அமாவாசை சிறப்பு !

தை அமாவாசையின் ஆன்மிக முக்கியத்துவம்

அமாவாசை என்பது சந்திரன் மறையும் நாள். இந்த நாளில் மனித மனம் அமைதியடையும் என்றும், ஆன்மிக சக்திகள் அதிகரிக்கும் என்றும் நம்பப்படுகிறது. தை அமாவாசை நாளில் பித்ருக்கள் (முன்னோர்கள்) பூமிக்கு அருகில் வருவார்கள் என்றும், அவர்களுக்கு செய்யப்படும் தர்ப்பணம் மற்றும் பூஜைகள் மூலம் அவர்கள் திருப்தியடைந்து சந்ததியினருக்கு ஆசீர்வாதம் அளிப்பார்கள் என்றும் இந்து மரபில் கூறப்படுகிறது.

ஜோதிட ரீதியாக சூரியன் பிதுர்காரகள் என்றும், சந்திரன் மாதுர்காரகன் என்றும் அழைக்கப்படுகிறார்கள். அமாவாசை என்பது மாதுர்காரகனும், பிதுர்காரகனும் ஒன்றாக இருக்கும் காலம் ஆகும். பிதுர்கார்களான சூரியன் மகர ராசியில்  பயணிக்கும் மாதமான தை மாதத்தில் வரும் அமாவாசை தினம் மிகுந்த முக்கியத்துவத்தைப் பெறுகின்றது. மேலும், ஆடி மாதம் வரும் அமாவாசையன்று மூதாதையர்களை வரவேற்கும் நாம், தை அமாவாசையன்று அவர்களுக்கு விடைகொடுத்து அனுப்பி வைக்கிறோம். 

பித்ரு தர்ப்பணத்தின் முக்கியத்துவம்

தை அமாவாசை அன்று செய்யப்படும் பித்ரு தர்ப்பணம் மிகவும் விசேஷமானதாகக் கருதப்படுகிறது. நதிக்கரைகள், கடற்கரை, தீர்த்தக் குளங்கள் மற்றும் வீட்டிலேயே கூட தர்ப்பணம் செய்யலாம். கங்கை, காவிரி, தாமிரபரணி போன்ற புனித நதிகளில் தர்ப்பணம் செய்வது மிகச் சிறப்பு வாய்ந்ததாக நம்பப்படுகிறது. பித்ருக்களுக்கு மரியாதை செலுத்துவதன் மூலம். குடும்பத்தில் அமைதி நிலவும், தோஷங்கள் நீங்கும், சந்ததி வளர்ச்சி பெறும், என்று நம்பிக்கை உள்ளது.

தை அமாவாசை மற்றும் புண்ணிய ஸ்தலங்கள்

தமிழ்நாட்டில் ராமேஸ்வரம், வேதாரண்யம், திருவாரூர், திருச்செந்தூர் போன்ற இடங்களில்,  தை அமாவாசை அன்று ஆயிரக்கணக்கான பக்தர்கள் கூடுவார்கள். கடலில் நீராடி பித்ரு தர்ப்பணம் செய்வது பாப விமோசனத்தை தரும் என பக்தர்கள் நம்புகின்றனர்.

சமூக மற்றும் குடும்ப பாரம்பரியம்

தை அமாவாசை என்பது தனிநபர் வழிபாடு மட்டுமல்ல; குடும்ப ஒற்றுமையையும் வெளிப்படுத்தும் நாள். குடும்பத்தினர் ஒன்றுகூடி முன்னோர்களை நினைத்து வழிபடுவது, அவர்களின் தியாகங்களை நினைவுகூர்வது, இளம் தலைமுறைக்கு பண்பாட்டையும் மரபையும் எடுத்துச் சொல்வதற்கான ஒரு நல்ல வாய்ப்பாக அமைகிறது.

தை அமாவாசை என்பது பித்ரு கடனை நினைவூட்டும் ஒரு புனிதமான நாள். முன்னோர்களை நினைத்து செய்யப்படும் வழிபாடு மனிதனுக்கு பணிவு, நன்றி உணர்வு மற்றும் ஆன்மிக தெளிவை அளிக்கிறது. இன்றைய வேகமான வாழ்க்கையிலும், இத்தகைய பாரம்பரியங்களை பேணுவது நமது கலாச்சாரத்தை காக்கும் ஒரு முக்கிய வழியாகும். அதனால் தை அமாவாசை என்பது ஆன்மிகம், மரபு மற்றும் மனிதநேயத்தை இணைக்கும் ஒரு உயரிய தினம் என்று கூறலாம். எதிர் வரும் 18.01.2026 ஞாயிற்றுக்கிழமை தை அமாவாசை தினமாகும். முன்னோரைப்போற்றி நலம் பெறுவாம்